بعد فرض الحجاب على البنات ماذا حدث.!(شعر حلمنتيشي)

مع قدوم الأنقاذ تم فرض الحجاب علي البنات فلنري ماذا حدث

مامن زمان الله قال اتحجبن
ورسولنا قال أتحجبن
الا بس عاملات طناش
تعوسن وتجوطن .. تتحنكشن
الأيات والأحاديث .. تب ما أقنعتكن
الا بعد كده.. سجمكن
الرئيس هو القال كده .. النشوف رجالتكن
‏@‏@@
عموما يا شباب
البنات هاديات وطبعن رضي
بس في نوع نآآآدر .. لكنو ردي
ديك أصلها ما بتهتدي
مو كان قالو حجاب وكدي
دي كان حجبوها بي خيمه
والخيمه قفلا سمكري
وقداما وقفو عسكري
برضو حتسوي كدي
ده لو ما ضيعت العسكري
‏@‏@@
ويوم زاعو قرار الحجاب
أمات شعرن طوال زعلانات
وأمات شعرن قصار ما صدقن
طوالي جن متربطات
‏@‏@@
لاقتني واحده أسمها التايه
وفي الحله بدلعوها بالتوت
وجات تنطنط زي عتود
بي فرحه قالت لي ده أكتر قرار مظبوط
اللابسه قصير في الشارع ما يخلوها تفوت
وكمان سألتني..
اها البتأكل لبان بدوها شلوت
قلت ليها .. دي يمسكوها من لسانا
ويجروها بالوآطه لحدي ما تموت
صرخت وقالت..
كمان فيها موت
كان كده من باكر أخلي سف الصعوط
‏@‏@@
واحدات لابسات بين بين
كلما تشوف عسكري تنزلو شويتين
ويرجع محلو كلما تخطو خطوتين
‏@‏@@
ندي حنكوشة حلتنا
قاعده جنب التلفزيون
جابو مزيعه متحجبه
صرخت يآآآآي
بابي بابي أوعه يكون انا حألبس كده
قاليها أيوا يا ندي حتلبسي كده
قالت لا يا بابي قول كلام غير كده
أته عارفني انا من السقط ما بتغطي
وجني وجن السخانه والشطه
قاليها أعمل ليك شنو يا بطه
قالت أي حاجه سويها
ان شاءالله تكلم ناس اللجان الشعبيه
وبدل الحجاب يخلوني أربط شمسيه
قاليها يا بت أتي غبيه
ده قرار فوقاني
ويمشي فوق راس كل سوداني
قالت خلاص يا بابي .. حأتحجب
بس يكون في معلومك ..ما حألبس معاه حاجه تاني
‏@‏@@
شويه كمان لاقتني واحده لابسه قميص حدو هنا
بحسن نيه سألتها..
اسع العاجبك في ده شنو
قالت لي.. حلفت بي ربي يقوم علي جنو
البس نظام طلع موضه في فرنسا أظنو
والعربشن الزيك لسه ما عارفنو
قلت ليها وده كمان كيفنو
قالت .. ده بس زراره هنا
قلت ليها والباقي يا ستي
ضحكت وقالت الباقي سيبك منو
‏@‏@@
حاجه كلتومه كمان أتحجبت
هووووي يا كلتومه
تغشي منو يا موهومه
الراس قبل يومين كان دومه
وعلي حس الحجاب
ربطت راسا بي فوطتين
وحشتو بي قطن مخدتين
وبالجنبات علب صلصه
في جنبه علبتين

» بعد فرض الحجاب على البنات ماذا حدث.!(شعر حلمنتيشي)
» باص البنات (حلمنتيشي)
» لما شفتك (حلمنتيشي)
» شعر حلمنتيشي:في الليلة ديك
» من شدة سماحتك (حلمنتيشي)