حسن الزبير والدكتور شادول في ان شاء الله القيامة تقوم

]حسن الزبير يتحدث بلسان زميل له رفضته احدى الزميلات عندما نوى التقدم لزواجها وكان شاعرنا الواسطة فيما يبدو
فكتب يقول
ان شاء الله القيامة تقوووووم
عشان ريدك معاي ما بدوم
ناس سهرانه طواااااالي
وناس طول الليلالي تنوم
أشوف أنا كيف حسابك يطول
علي الوعد الدوام ممطول
وانا الشايف كتير أحباب
يعيشو الريدة عرض وطول
أنا الشايل دوام همك
وأريدك ريدة زي أمك
وأغير من غيرتي زاتا عليك
أخاف أنا يالخفيف دمك
وان شاء الله القيامة تقوم
وكل زول يمشي في حالو
عشان ماقلبي يرجع يقول
حبيب الدنيا في بالو
**************************************************
كان ممكن الموضوع ينتهي هنا عند هذا الحد لكن دكتور أحمد فرح شادول وهو
صديق الاستاذ حسن الزبير قال ليهو الحكاية حاصلة ليك انت ما لي صاحبك ورد عليه
بقوله
ان شاء الله الحسادة تطير
وتمتد السعادة تدوم
والضاق العذاب في الريد
بكرة يعيش ويشبع نوم
وتقول القيامة تقوم ؟؟؟
عشان حظك شقي ومشئوم
وفتحن ليك بنات حواء
وجافاك ليلة واحدة النوم
تقول القيامة تقوم!!!
أنحنا لا عرفنا الريد
ولا زيك عشقنا الغيد
وحبيبنا القريب وبعيد
وراجعنا القديم وجديد
ولا ضمانا حضن الليل
مع الوجه البهي وغريد
ولا للليل شكينا حبيب
اذا حتى العشقنا عنيد
********************************************

لم تنتهي الحكاية بعد فقد جاء رد حسن الزبير على الدكتور شادول
كما يلي
ان شاء الله القيامة تقووووم
وعشمي في الله ما شوية
أدخل جنة المأوى
وهناك يدوني حورية
وأتكي في الأرائك أنوووووم
بكل حبور وحرية
وأرتاح من ده مافي وقوم أمشي جيبلي وجيب ليا
أفارق دنية المعدوم وألقى مطالبي بالنية
ولو حنيت لي لحم الطير تجيني طيرة مشوية
عشانك كييية يادكتور
تكون حوريتي خمرية
تجرجر ديسا دا المردوم
ولهجتا خالصة عربية
وأخلي ليك بنات حواء تحاحي صباح وعصرية
وتبقى عواطلي يادكتور هناك لا مرض ولا شكية
هناك لا أذن سمعت ولا بعيونا مرئية
هناك حتى الرحيق مختوم وولدان طايفة دورية
لا عشوائي في الخرطوم ولا صفقات تجارية
صفي النية يامهجوم بلاش هجمات هبوبيية
وان شاء الله القيامة تقووووووووووووووووووم
وتنجح مية في المية
****************************************************
ومن رد دكتور شادول على ود الزبير أبياته الجميلة والمتفائلة
تقول القيامة تقوم
أنحنا مع السعادة نسير
مواكب فرحة هادرة هدير
نحيا نحب نعيش ونغير
ونعلن ثورة التغيير
نأكل حب
ونشرب حب
ونلبس حب
ونفرح بالمحبة نطييير
نعيش الريدة عرض وطول
كبيرنا ملك صغيرنا أمير
وتسمع صوت هتافنا اجيك
أن شاء الله الحسادة تطير
وتكبر وتنسى يا زغبير
**********************************
أما أنا فأتمنى السعادة لكم جميعآ وبصفة خاصة ابني شريف
وان شاء الله القيامة ما تقوم الا وقد تحققت أمانيكم الحلوة

[ندعوك للتسجيل في المنتدى أو التعريف بنفسك لمعاينة هذه الصورة]

شكرآ نشأت على مرورك الجميل وأرجو أن نشكل حضورآ دائمآ في المنتدى تشجيعآ لكل حاجات الرائع شريف الفحيل
تحياتي وسلامي وعشمي في تواصل بل تعارف أكبر

» توبة شاب بعد أن رأى يوم القيامة
» في حضرتك *** أحمد شادول
» اتفضل حب ** دكتور شادول
» تلخيص كتاب القيامة الكبرى
» من ديوان خريف الرجعة للدكتور أحمد شادول